Message copied from 《搵車快線》
Dream Car
BMW E30 M3、M-Benz 190E 2.5-16、Ford Sierra RS & Nissan Skyline GT-R R32
時間——一個風和日麗的下午；地點——港島東某處；人物——6個愛車如命的中年男人；車輛——４部80-90年代叱咤風雲的跑車。
這個下午很不平凡，6個男人不斷影相，有如龍友見到o靚模一樣，雙眼露出飢渴的眼神，為的就是把4部20年前在澳門東望洋賽道威盡的跑車攝入相機內，這個機會比拉利Enzo遇上林寶Reventon更難得！事關《搵車快線》像華山論劍般，重安排了E30 M3、190E 2.5-16、Sierra RS及GT-R R32來一次20年後大激鬥。
對很多20出頭的車迷來說，見到新款林寶、拉利或GT-R就如對神一樣膜拜，對我們今次的專題可能不屑一顧，4部車冇一部有supercar扁車身、亦冇什麼拆天死氣喉，仲要有2部係4門房車，可能望多眼都費事！不過30過外的朋友看到4部車後，潛藏在心底的激情一定按捺不住，興奮之情如同青春期時初次接觸異性一樣，既驚且喜，好想走近一點摸勻全個車身，再上車翻雲覆雨。4部車有這份引死熟男的本事，全因他們20年前共同在澳門賽道上寫下史上最光輝的一頁，可一不可再！
左：BMW E30 M3 Spec.
引擎：2,302c.c.直四
馬力：195ps/6,750rpm
扭力：23.5kgm/4,750rpm
傳動：5前速手波
當年車價：約$800,000
現時車價：約$250,000
右：Mercedes-Benz
190E 2.5-16 Spec.
引擎：2,498c.c.直四
馬力：204ps/6,750rpm
扭力：245kgm/4,500-5,500rpm
傳動：5前速手波
當年車價：約$800,000
現時車價：約$50,000
橫掃戰場20載 BMW E30 M3
今日BMW在澳門有無敵的姿態，全因多年來熱衷參與賽事，在賽道上收集了無數的data，而今時今日仍以3系作為鬥車，就是源於1987年的E30 M3！M3之前BMW以635CSI參加比賽，成績只算中等，全因車身太大，不太適合跑松山，因此當年最新開發的小跑車M3就大派用場，一上場即時包辦冠亞季軍，成績一時無兩，同時期的唯一對手只有M-Benz的190E 2.5-16，不過只構成威脅，無辦法挑戰其王者地位。
罕絕高轉狂
初代M3之所以在本港極之罕有，全因當年廠方只生產左軚版本，根本唔可以在港出牌，個個都得個恨字，雖然後來有英國改裝公司改右軚出售，但數量唔多，而且改了右軚後車身平衡不及左軚好，所以本港數目不出3部。
今次借出拍攝的M3是原裝左軚版，是車主Tony約於5年前從英國購入，至今狀態仍有95%新，是4部車之中保存得最靚一部，據Tony所講當年入手只係8萬英鎊左右，即是約12萬港幣，今日英國已炒賣到過25萬港幣，升值達100%！雖然M3係一代車王，不過以今日跑車標準睇，大概只是小跑車，用2.3公升直四引擎，最大馬力195匹，而且着眼高轉表現，Tony話佢十足Civic Type R，要快就要狂keep高轉，慢揸就同325冇分別。
經典賽事不再可
20年前的東望洋頂級A組房車賽的車種限制不像現時般嚴格，亦未成為WTCC的其中一站，車廠大都派出最頂級的型號參戰，大大提高宣傳性，而觀眾亦睇得過癮。不過今日賽例嚴謹，4百幾匹M3唔可以落場，反而用320i作賽，投入感差一大截。
既生瑜 何生亮 M-Benz 190E 2.5-16
M-Benz在近20年澳門賽車歷史上沒有什麼大建樹，190E 2.5-16雖同M3同期加入戰團，但兩者關係就好似周瑜同諸葛亮，190E 2.5-16永遠贏唔到M3，最巴閉係1991年以190E 2.5-16 Evolution II取得亞軍及季軍，冠軍又是M3，一世二奶命！雖然Evolution II冇右軚，不過190E 2.5-16生產版就有右軚，當年車價雖然過80萬，但由於M-Benz從未出過外表如此惡辣誇張的小跑車，所以仍有不少有錢佬爭住買，香港人對它的親切感一定大過M3。
忽然失心瘋
190E 2.5-16可說是M-Benz可一不可再的瘋狂出品，4門車身罕有地加上如高達戰甲般的平面方角包圍，車廂更狼到起用4張真皮桶座！機械方面，引擎採用2.5公升直四款式，最大馬力197匹，值得一提是當年M-Benz仍未收購AMG，排氣喉部分找來Cosworth幫手，打開頭冚可見死氣蕉十足大改賽車般扭到八爪魚一樣，相當嚇鬼！
筆者都曾擁有過190E 2.5-16，它的引擎表現同現在著重低轉的M-Benz房車大大不同，低轉時引擎好似未食飯！但谷到過3,000rpm，就好似突然醒晒一樣，100km/h過後的高速比M3有過之而無不及。不過最大問題係轉向系統仍採用走珠式，敏感度不及天梯牙式，扭軚輕浮有虛位，在多彎的澳門賽道一直輸畀M3。
性能不可同日而語
不要以為4部車全是東望洋王者就有非凡速度，其實除R32外，其餘3部車都只是200匹馬力左右，0-100km/h都只係6秒左右，現時一部1.4 Golf GT都可以K.O.佢哋。雖然R32馬力大又易keep，保養得好都仲有新車8成功力，但家一樣快唔過啲易手價差不多的Evo. VII，主要用嚟珍藏，飛就免喇！
左：Nissan Skyline GT-R
R32 Spec.
引擎：2,568c.c.直六Twin turbo
馬力：280ps/6,800rpm
扭力：36.0kgm/4,400rpm
傳動：5前速手波
當年車價：約$700,000
現時車價：約$160,000
右：Ford Sierra RS Spec.
引擎：1,993c.c.直四turbo
馬力：204ps/6,000rpm
扭力：28.4kgm/4,500rpm
傳動：5前速手波
當年車價：約$600,000
現時車價：約$40,000
四驅街霸 Ford Sierra RS4
當M3與190E 2.5-16鬥得火熱的時候，1988年突然殺出一個程咬金，佔了當年的季軍席位，1989年更一舉殲滅所有對手囊括頭三名，它就是Ford Sierra RS。Ford Sierra RS之所以有這份能耐，是因為當年的低規範賽制，令身懷2.0公升turbo引擎、201匹馬力輸出及有四驅系統的Sierra RS可以超班參賽，基本上用NA引擎的M3同190E 2.5-16都冇還手之力，慘被放爆！
大turbo狂牛
Ford突然有部Sierra RS推出，全賴由Cosworth調校引擎，加入Garret T3 turbo及intercooler，3,000rpm打後發力有如江河决堤，turbo lag大到不得了，就算90年代GC8 WRX都冇佢咁狼！
Sierra本身是中型豪華房車，就算RS版都保留大量豪裝，前座真皮坐位由Recaro提供，不是一味又硬又窄，大腿兩側及兩肩都用厚墊承托，筆者肥大身形都覺得舒適。此外，叱咤澳門的Sierra RS其實已是第二代車款，由尾轆改行四驅，但推頭不算嚴重，動態靈活，軚感頗為敏銳，就算今日劈一轉入石澳，都依然可以輕鬆擊敗M3同190E 2.5-16。全賴車主Nelson花盡心機翻新，其中引擎部分最難搞，turbo開始老化，要更換大量零件先有好狀態，整車使費比車價更高。
原裝戰神最保值
4車中以R32易手價最硬淨，1部brand new牌簿約18年車齡的R32，易手價可高達16萬，就算是水貨車都要12萬，愈原裝愈貴。M3就因為冇右軚版，左軚版不打稅都要25萬。Sierra RS連網上亦沒有交易紀錄，但估計2-5萬已可買到。數量較多的190E 2.5-16質素好的要3-5萬，不過手波版卻甚為罕有。
戰神再起Nissan Skyline GT-R R32
自1989年Sierra RS成功以「大蝦細」的姿態稱王後，1990年又出現另一王者，它就是人稱戰神的Nissan Skyline GT-R R32。GT-R R32的出現比Sierra RS更爆、更有戲劇性！當年由日本車手長谷見昌弘駕駛，賽前沒有人估到一部日本車加一個日本車手可以有什麼好成績，點知一起步GT-R R32就遙遙放爆所有對手，由頭帶到尾，過終點時比亞軍的M3快近30秒，以完全壓倒姿態成為王者！
出戰場入市場
更誇張是R32的性能太勁，迫到賽會都要即時改賽例，在來季為所有turbo車加磅，自此R32就再沒在東望洋攞過獎。事實上R32當年的規格實在贏得輕鬆，2.6公升直六引擎加雙turbo，最大馬力達280匹，而且仲有當時最先進的ATTESA E-TS電子四驅，比Sierra RS高幾班，直路與山路都無敵，在東望洋一鳴驚人後，不需再靠戰績已可風靡全球。
車主Martin擁有GT-R R32一年多，對部車可說完全冇投訴，至今狀態仍有當年8-9成功力，惟獨不滿四輪轉向系統對車尾動態有較大規限，因此已廢掉。保養方面，由於GT-R R32已屬90年代日本車，零件及維修技術很多車房都做得到，因此比其餘3部車都易keep，惟市面上很難找到一部原裝車。
保養得宜有排玩
20年車齡不算大，當中M3及190E 2.5-16因採用自然吸氣引擎，引擎耐用性較好，亦較易保養，而且外國零件多，只要不強行催谷，玩多20年都得。反而Sierra RS及GT-R的turbo引擎就要小心，油溫、水溫及turbo壓力都要留意，高壓喉亦要勤檢查，方可命長久。特別是經典度不太高的Sierra RS，在4部之中最難找零件。 - (id:kenwchch)
Tony雖擁有多部supercar，但仍最愛E30 M3。
首代M3採用直四引擎，之後3代已改用直六及V8。
前座是真皮桶座，仍保養得光潔如新。
原廠只有左軚版本，如果改為右軚，對車體平衡有些微影響。
當年澳門落場GT-R係超A組規格，勁過家啲BMW多多聲。
同時擁有190E 2.5-16及Sierra RS的車主Nelson表示，190E 2.5-16的外表最吸引，以今日的標準來看雖然不算快，但玩樣已夠了。
手波版190E 2.5-16極為罕有，留意R波是設在常見的1波位置，傳統2波位先係1波。
引擎排氣部分由Cosworth負責，死氣蕉左扭右扭，十足賽車。
單看駕駛艙未必可以感受到跑車感覺，但當年來說很跑了。
新款Golf GT用Twincharge引擎，有成160匹，加上車輕靈活，仲快過呢班元老戰車。
用上Garret T3 turbo，令turbo lag比現時所有車都大。
大大隻turbo毫無保留地放在引擎旁，一打開頭冚就見到。
Sierra當年算是豪華房車，因此車廂的氣氛充滿貴氣。
RS版的前後真皮坐椅均出自Recaro。
190E 2.5-16 EVOII是最尾期版本，全球只有502部左軚版，日本已炒到港幣約45-50萬1部，馬力有232匹。
車主Martin表示，GT-R的性能在當年超班，今日仍有心有力！
R32周身都係寶，原廠桶凳都是熱門易手parts。
原裝已設有電壓、油溫及bar表，方便監察各項數據。
R32出現得比其餘3部車遲，車廂布局都較為現代化。
Turbo車最緊要留意偈油溫度，加個電子油溫表睇實最好。 |
