http://hk.apple.nextmedia.com/te ... amp;art_id=15345264
一套都唔想睇. 都唔知點解要嚇自己.
20大 Blu-ray恐怖片
1.《幽靈乘客》
呢類講空難嘅電影，實情都唔係第一部！佢最與別不同係劇情發生於空難後，除咗有獲金球獎提名嘅男女主角演出，內容大部份亦講述劫後餘生之後，乘客自述在客機上嘅種種矛盾心情。
2.《驅魔殿堂》
鬼佬相信精密科學多於牛鬼蛇神，呢套戲正是引用男主角米高哥費克對鬼神嘅懷疑，直至佢後來相信及見到靈異現象嘅事情為結束，改編自真人真事。 Bonus仲有另一個結局，可能有意外驚嚇。
3.《怪談》
近期最 Hit嘅港產「驅鬼人」，睇怕非司徒法正莫屬！佢繼之前殺入電台、電視節目之後，今次仲拍攝咗首部《怪談》電影，親身帶你去泰國、台灣探索靈異事件。何謂自己找上門？呢隻碟有辦你睇！
4.《猛鬼寬頻 3》
鬼魂附於網絡世界之內，以網民作為替死鬼，題材都算新穎。到咗第三集，小女孩絲汀已經 17歲，故事講述佢喺廢置電腦內突然收到一封匿名網客要求見面嘅 Email，唔識死嘅佢再次踏入寃魂之城。
5.《 RUBBER》
輪胎都識殺人？真係唔講得笑！呢隻美版英文 Blu-ray，故事就係以鬼魂附於一個輪胎作題材，聽落似乎唔多驚嚇，不過畫面勁血腥！另一要留意嘅係呢套戲並無喺香港上映，中文行版碟或會推出無期。
6.《 3D鬼洞》
呢期 3D電影大熱，就連鬼片都唔會放過！可惜， Blu-ray最終只係以 2D畫面呈現，有啲失望。碟版最大賣點係支援 Dolby TureHD 7.1聲效，若然你屋企已經裝晒全屋音響組合，不妨留意其細微音效。
7.《攝靈》
靈異照片不嬲都係鬼故事重要題材，《攝靈》正是由一宗汽車意外拍攝到嘅幽靈照片作開端。雖然佢屬於一套荷李活電影，但拍攝場景主要喺日本發生，加上出過遊戲版，話唔定睇完會勾起日式鬼片嘅感覺。
8.《異度見鬼》
實情係港產電影《見鬼》嘅外語版。主角唔係李心潔，而係由謝茜嘉艾芭飾演嘅失明小提琴演奏家。故事跟港版改動唔多，某啲場口仲似曾相識，但係經外國班底製作，聲畫表現或許比港版更好。
放大圖片
9.《猛鬼街》
經典 Freddy已經拍咗八集咁多，不過呢隻 Blu-ray係重新拍攝嘅第一集。唔使多講，畫質同聲效當然比十幾年前有大幅進步；另一賣點係 Bonus內附另一版本嘅開首和結局，睇完正場值得再煲。
10.《凶鏡》
劇情圍繞一名前度警員，佢為拯救家人被邪靈入侵，不惜對抗從鏡中撲出嚟嘅恐怖力量。呢套戲源自韓國電影《鬼鏡》，除咗玩營造氣氛以及逼真嘅血腥化妝外， Bonus更內附加長版，嚇多你一次。
11.《靈時 3點 3》
半夜時分，再加上陰氣極盛嘅古堡大宅，就算創意唔夠，但呢類題材已可嚇死唔少夜晚一個人瞓嘅少男少女。呢套戲賣點之一係營造出好緊張嘅環境氣氛，令到你無乜時間鬆番口氣。
12.《鬼船》
最令人難忘係開始時一片歡樂熱鬧嘅笑聲中，突然間，幾乎全船人被一條鋼纜將身體割成兩半，畫面驚嚇度爆燈！而 Blu-ray版 Bonus更提供精采嘅鬼船設計圖，加埋鬼船小故事，感覺更撲朔迷離。
13.《鬼驅人》
Tobe Hooper經典鬼片，點可以錯過！背景講述一家五口喺新屋內發生種種怪事，像傢俬無故移動，後來發現該地前身係墳場，發展商一直無將地下嘅棺木屍體搬走，令屋內陰魂不散。
14.《活死人凶間》
疑似 Biohazard式喪屍電影，劇情鋪排同傳統鬼片有別，《活》充斥大量血腥屠殺嘅殘忍畫面，同時仲可感受室內套高級音響嘅爆炸力。呢類片勁多槍林彈雨嘅場口，怕核突就唔好睇喇！
15.《升降凶間》
由禮切沙也馬蘭拍攝嘅鬼片，向來劇情主導。《升》雖然大部份場景都位於電梯及大廈內，但睇見內每個人逐一離奇死亡，實在令人毛骨悚然；同時片中提到因果輪迴，好玄。
16.《活死人地帶》
另一套又係不斷打喪屍嘅電影，畫面夠晒血肉模糊。至於聲效方面亦可測試到低頻以及惡心嘅食人、咀嚼等 Sound Effect。《活》片特別加入索女角色，叫你受驚之餘，都有啲補償。
17.《奪命謎陣》
導演係《猛鬼街》同《奪命狂呼》嘅韋斯奇里雲，故事講一名精神分裂者於鎮內大開殺戒， 16年後事發日出生嘅七名青年，竟逐一死亡。究竟係屠夫陰魂不散返來報仇，抑或事有巧合？
18.《午夜來嚇》
睇完第一集，大家仲敢唔敢一個人瞓？上集喺美國勁收得，今次繼續玩低成本製作，以手搖 Camera拍攝再加上閉路電視效果，營造出好真實嘅環境。夜晚熄燈睇，小心嚇破膽！
19.《驚兆》
好多鬼片導演都鍾意搵細路仔做主角，唔通佢哋認為，天真無邪嘅小朋友最易同靈體溝通？《驚》片亦係禮切沙也馬蘭代表作，舊式大宅再加小朋友呢個元素，又一鬼片方程式。
20.《害匙》
喺大宅內，只有一間房係無鎖匙開門！荷李活式鬼片不嬲講班主角好大膽，既然開唔到，就更加想盡方法了解真相。值得注意女主角係 Kate Hudson，勁騷露背裝，令人既驚心又要睇。 |
